İyunun 19-da Naxçıvan Muxtar Respublikası Ali Məclisinin sədri Vasif Talıbov Fələstin dövlətinin ölkəmizdəki fövqəladə və səlahiyyətli səfiri Nəssir Əbdül Kərim ilə görüşmüşdür.

Səmimi qəbula görə minnətdarlıq edən səfir Nəssir Əbdül Kərim Azərbaycanın qədim diyarı olan Naxçıvana səfərindən məmnun olduğunu qeyd etmişdir. Dost ölkə olan Azərbaycanda Fələstin səfirliyinin 2 il bundan əvvəl açıldığını bildirən səfir diplomatik fəaliyyəti dövründə ölkəmizlə, eləcə də Naxçıvan Muxtar Respublikası ilə əlaqələrin inkişaf etdirilməsinə çalışacağını vurğulamışdır.

Ali Məclisin sədri Azərbaycanla Fələstin arasında siyasi sahədə əlaqələrin mövcud olduğunu bildirmişdir. Qeyd olunmuşdur ki, Fələstinin ölkəmizdə səfirliyinin fəaliyyət göstərməsi əlaqələrin inkişafı baxımından mühüm əhəmiyyət daşıyır. Hazırda Azərbaycanla Fələstin arasında iqtisadi sahədə də əlaqələr inkişaf etdirilir.

Naxçıvan Muxtar Respublikası ilə Fələstin arasında iqtisadi sahədə əlaqələrin inkişafı üçün yaxşı potensialın olduğunu bildirən Ali Məclisin sədri səfirə diplomatik fəaliyyətində uğurlar arzulamışdır.

Görüşdə qarşılıqlı maraq doğuran məsələlər ətrafında fikir mübadiləsi aparılmışdır.

Nəssir Əbdül Kərim səfər çərçivəsində Naxçıvanın görməli yerləri, tarixi abidələri, təhsil və istehsal müəssisələri ilə tanış olacaqdır.

“Xalq qəzeti”