Avropa İttifaqının genişlənmə və qonşuluq siyasəti üzrə yeni təyin edilmiş komissarı Ştefan Füle Cənubi Qafqaz ölkələrinə rəsmi səfəri çərçivəsində aprelin 9-da Azərbaycana gələcəkdir.
Bunu Avropa Komissiyasının Azərbaycandakı nümayəndəliyinin rəhbəri səfir Roland Kobia aprelin 6-da keçirdiyi mətbuat konfransında demişdir. R.Kobianın sözlərinə görə, səfər zamanı avropalı komissar Azərbaycan rəsmiləri ilə bir sıra görüşlər keçirəcəkdir. Görüşlərdə Azərbaycan və Aİ arasında əlaqələr, "Şərq tərəfdaşlığı" Proqramı və digər məsələlər müzakirə ediləcəkdir.
R.Kobia, həmçinin bildirmişdir ki, aprelin 14-də Aİ-nin enerji məsələləri üzrə yeni komissarı Qerman Ottinqer Bakıya səfər edəcəkdir. Komissarın Azərbaycan rəsmiləri ilə keçirəcəyi görüşlərdə Aİ və Azərbaycan arasında enerji əməkdaşlığı, "Cənub dəhlizi" və "Nabukko" layihələri ilə bağlı məsələlər müzakirə ediləcəkdir.
AzərTAc{nl}