İyulun 19-da xarici işlər naziri Elmar Məmmədyarov ölkəmizdə rəsmi səfərdə olan Ukraynanın xarici işlər naziri Konstantin Qrişenko ilə görüşmüşdür.
Görüşdən sonra birgə mətbuat konfransı keçirən nazirlər müzakirə olunmuş məsələlər haqqında məlumat vermişlər.
E.Məmmədyarov bildirmişdir ki, bu səfər Azərbaycan ilə Ukrayna arasında ikitərəfli münasibətləri yeni mərhələyə qaldırmağa imkan verəcəkdir. Görüşdə siyasi, iqtisadi, humanitar, energetika və digər sahələrdə əməkdaşlıq məsələləri müzakirə olunmuşdur.
Ermənistan-Azərbaycan, Dağlıq Qarabağ münaqişəsinin nizamlanması ilə bağlı ölkəmizin mövqeyi barədə ukraynalı qonağa məlumat verilmiş, məsələnin yalnız Azərbaycanın ərazi bütövlüyü, sərhədlərin toxunulmazlığı prinsipi çərçivəsində nizamlanmasının mümkünlüyü vurğulanmışdır.
Ölkəsinin Azərbaycan ilə iqtisadi sahədə əməkdaşlıqda, əsasən də enerji daşıyıcılarının nəqlində maraqlı olduğunu deyən K.Qrişenko vurğulamışdır ki, Azərbaycan ilə münasibətlər Ukrayna üçün mühüm əhəmiyyət kəsb edir.
Ermənistan-Azərbaycan, Dağlıq Qarabağ münaqişəsinə toxunan ukraynalı nazir qeyd etmişdir ki, Ukrayna bu məsələnin beynəlxalq hüququn normaları və prinsipləri, o cümlədən ölkələrin ərazi bütövlüyü çərçivəsində həllinə tərəfdardır. Ukrayna Cənubi Qafqazda sülhün və sabitliyin bərqərar olmasında maraqlıdır, bu, təkcə regional səviyyədə deyil, bir sıra qlobal məsələləri də həll etməyə imkan verəcəkdir.{nl}