Braziliya Federativ Respublikasının Azərbaycandakı səfiri Paulo Antonio aprelin 5-də ədliyyə naziri, Məhkəmə-Hüquq Şurasının sədri Fikrət Məmmədovla görüşmüşdür.
Ədliyyə Nazirliyinin mətbuat xidmətindən bildirmişlər ki, görüşdə dövlətlərimiz arasında dostluq münasibətlərinin inkişaf etdiyi, hüquq sahəsində əməkdaşlığın möhkəmləndirilməsinə maraq göstərildiyi, bu əlaqələrin genişləndirilməsi üçün perspektivlərin olduğu vurğulanmış və konkret təkliflər irəli sürülmüşdür.
Eyni zamanda, BMT-nin beş ildən bir təşkil olunan cinayətkarlığın qarşısının alınması və cinayət ədliyyəsi üzrə 12-ci Konqresinin aprel ayının ortalarında Braziliyanın Salvador şəhərində keçiriləcəyi tədbirdə transmilli cinayətkarlıqla mübarizədə beynəlxalq əməkdaşlıq, narkotiklərin dövriyyəsinə, insan alverinə, çirkli pulların yuyulmasına qarşı tədbirlər və bu kimi digər mühüm məsələlərin müzakirə olunacağı qeyd edilmiş, ölkəmizin bu mötəbər forumda iştirakı ilə bağlı məsələlərə toxunulmuşdur.
Azərbaycan ədliyyə nazirinin vitse-prezidenti olduğu Beynəlxalq Antikorrupsiya Orqanları Assosiasiyasının İcraiyyə Komitəsinin iclasının məhz Salvadorda, Konqres ərəfəsində keçiriləcəyi bildirilmişdir.
Sonra qonaq nazirlikdə Ədliyyə tarixi muzeyi ilə tanış olmuşdur.{nl}