Azərbaycanın xarici işlər naziri Elmar Məmmədyarov ABŞ-a səfəri çərçivəsində bu ölkənin Prezidentinin xüsusi köməkçisi və Milli Təhlükəsizlik Şurasında Avropa Məsələləri üzrə direktoru Karen Donfrid ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə ABŞ və Azərbaycan arasında ikitərəfli münasibətlərə, həmçinin BMT və NATO kimi beynəlxalq təşkilatlar çərçivəsində əməkdaşlığa dair müzakirələr aparılmışdır.

Elmar Məmmədyarov Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində aparılan danışıqlar barədə məlumat vermişdir. Diqqətə çatdırılmışdır ki, problemin həlli üçün ilk növbədə Ermənistan qoşunları işğal olunmuş Azərbaycan ərazilərindən çıxarılmalıdır. Bu tələb, həmçinin BMT Təhlükəsizlik Şurasının qətnamələrinin müddəalarında da əksini tapmışdır.

Karen Donfrid ABŞ administrasiyasının münaqişənin sülh yolu ilə ədalətli həllinin tərəfdarı olduğunu bildirmişdir. Vurğulanmışdır ki, münaqişənin həlli regionun inkişafı baxımından önəmlidir. Azərbaycanın regionun enerji təhlükəsizliyinin təmin olunmasında önəmli rolunu qeyd edən Karen Donfrid bu sahədə uğurlu əməkdaşlığın daha da genişləndirilməsində maraqlı olduqlarını bildirmişdir.