Mayın 31-də Ailə, Qadın və Uşaq Problemləri üzrə Dövlət Komitəsinin sədri Hicran Hüseynova NATO-nun baş katibinin qadın, sülh və təhlükəsizlik üzrə xüsusi nümayəndəsi xanım Mari Skare ilə görüşmüşdür.

AzərTAc xəbər verir ki, görüşdə ikitərəfli münasibətlərin inkişaf perspektivləri, qarşılıqlı maraq doğuran bir sıra mövzularla bağlı fikir mübadiləsi aparılmışdır.

Sonra qadın QHT təşkilatlarının nümayəndələrinin iştirakı ilə tədbir keçirilmişdir.

Xanım M.Skarenin fəaliyyəti barədə məlumat verən H.Hüseynova münaqişələrin qarşısının alınması və həllində, həmçinin sülh quruculuğunda qadınların mühüm rolunu qeyd etmişdir.

M.Skare Azərbaycan ilə NATO arasında qadın, sülh və təhlükəsizlik məsələləri istiqamətində əməkdaşlığın genişləndirilməsinin əhəmiyyətini vurğulamışdır. O, Azərbaycan ilə NATO arasında uğurlu əməkdaşlıq əlaqələrinin olduğunu qeyd edərək ölkəmizin alyansın bir sıra proqramlarında fəal iştirak etdiyini bildirmişdir.

BMT-nin Təhlükəsizlik Şurasının qadın, sülh və təhlükəsizlik məsələlərinə dair 1325 saylı qətnaməsini diqqətə çatdıran qonaq sülh və təhlükəsizliyin qorunmasına yönəlmiş səylərdə qadınların bərabərhüquqlu iştirakının vacibliyini vurğulamışdır.