Azərbaycanın və  Rusiyanın xarici işlər nazirləri  Elmar Məmmədyarov və Sergey Lavrov Moskvada apardıqları  danışıqların  yekunlarına dair  mətbuat konfransı keçirmişlər.  Görüşdə  Azərbaycan ilə Rusiyanın  xarici işlər nazirlikləri arasında 2013-2014-cü illər üçün məsləhətləşmələr  planı imzalanmışdır.

Azərbaycanın xarici işlər naziri Elmar Məmmədyarov  jurnalistlər qarşısında çıxışında demişdir: “Azərbaycan ilə Rusiya arasında münasibətlər müxtəlif sahələr nöqteyi-nəzərindən  çox müsbətdir. Münasibətlərimiz həm ikitərəfli əlaqələr, həm də  iqtisadi  baxımdan  Azərbaycan ilə Rusiyanın dövlət başçılarının  2008-ci ildə imzaladıqları  Strateji Tərəfdaşlıq haqqında Sazişə müvafiq olaraq yüksələn xətt üzrə inkişaf  edir və biz bu sənəd çərçivəsində hərəkət edirik”.  Azərbaycan XİN-in başçısı qeyd etmişdir ki, Moskva ilə  Bakı  Rusiya-Azərbaycan münasibətlərinin gündəliyini və Dağlıq Qarabağ  münaqişəsini müzakirə etmişlər. Nazirin sözlərinə görə,  Azərbaycan Dağlıq Qarabağ münaqişəsinin həlli prosesində  durğunluğun aradan qaldırılacağına  ümid bəsləyir. Azərbaycan naziri demişdir: “Bu gün  Dağlıq Qarabağ münaqişəsinin nizama salınması məsələsini müzakirə etdik. Biz  Rusiyanın regionda və həmsədr qismində  rolu nöqteyi-nəzərindən ilk növbədə danışıqlar  prosesinin üzləşdiyi  durğunluğun qarşısının alınmasını gözləyirik”.  Onun sözlərinə görə,  prezident seçkilərindən sonra Azərbaycan Dağlıq Qarabağ  münaqişəsinin  həllində irəliləyişə nail olmaq üçün hərbi qüdrətini artıracaqdır.

Rusiyanın xarici işlər naziri Sergey Lavrov demişdir ki, Rusiya üçün xarici siyasətin  prioritetlərindən biri  Qafqazda sabitlikdir, odur ki, Moskva həmin vəziyyəti hərəkətə gətirmək üçün hər cür səy göstərəcəkdir. Rusiya XİN-in başçısı vurğulamışdır ki,  indiki halda  tələsik nəticə çıxarmaq olmaz. S.Lavrovun sözlərinə görə,  Rusiya  bu istiqamətdə  işi davam etdirir. Bu günlərdə  Azərbaycan ilə  Ermənistan nazirlərinin görüşü  olmuşdur. Kompromisin  və münaqişənin həlli yolunun  axtarılması üzrə prosesləri hər cür dəstəkləmək,  bilavasitə iştirak edən bütün tərəflərin  daxili siyasi  təqvimlərini nəzərə almaq   lazımdır.  S.Lavrov demişdir: “Heç kəs əlini bu işdən soyutmağa hazırlaşmır. Biz bu problemin həlli üçün  hər cür şəraitin yaradılmasına hərtərəfli kömək edəcəyik”. S.Lavrov  Bakı-Novorossiysk  neft kəmərinə dair müqavilənin fəaliyyətinin dayandırılması məsələsinə toxunaraq demişdir ki,  Bakı-Novorossiyk neft kəmərinə dair müqavilənin  fəaliyyəti Rusiya tərəfindən  sırf  iqtisadi səbəblərdən  dayandırılmışdır.  O demişdir: “Bununla əlaqədar olaraq  iki ölkənin  energetika  idarələri hazırda  yeni iqtisadi reallıqları  əks etdirən  yeni hökumətlərarası  sazişin hazırlanması ilə məşğuldurlar”.

Azərbaycanın və Rusiyanın xarici işlər nazirləri  “Eurovision-2013"  mahnı müsabiqəsində balların yoxa çıxması  ilə bağlı  məsələyə də toxunmuşlar. RF XİN-in başçısı Sergey Lavrov  Azərbaycan vətəndaşlarının ”Eurovision" mahnı müsabiqəsinin rusiyalı iştirakçısı Dina Qaripovaya verdikləri səslərin yoxa çıxmasını  biabırçı fakt adlandıraraq xəbərdarlıq etmişdir ki,  bu məsələ cavabsız qalmayacaqdır. O demişdir: “Biz bu biabırçı  aksiyanın cavabsız qalmaması üçün birgə fəaliyyətimizi razılaşdıracağıq”. E.Məmmədyarov bildirmişdir ki, Azərbaycanın üç mobil rabitə operatoru üzrə səslərin yoxlanmasının nəticələrinə görə Rusiya ikinci yerdədir. Azərbaycan əhalisinin böyük bir hissəsi Rusiya ifaçısına  səs vermişdir.

Azərbaycan naziri demişdir: “Azərbaycanın ən iri  mobil rabitə operatoru 1677 səslə  Rusiyanı ikinci yerə qoymuşdur. Qalan  mobil rabitə  operatorları da  yüksək ballar açıqlamışlar.  Səslər necə oldu, hara yoxa çıxdı? Əlbəttə, bu sual Avropa Yayımları Birliyinin əsas tərəfdaşı olan bizim İctimai Televiziyaya verilməlidir”.  Mətbuat konfransında verilən məlumata görə, tərəflər razılığa gəlmişlər ki,  Azərbaycan İctimai Televiziyası  hüquqi məqamları  aydınlaşdırdıqdan sonra  birgə  fəaliyyət razılaşdırılacaqdır.

Fəridə ABDULLAYEVA

AzərTAc-ın xüsusi müxbiri

Moskva