Mayın 20-də Türkiyənin Azərbaycandakı səfiri İsmail Alper Coşkun Mərkəzi Seçki Komissiyasında (MSK) olmuşdur.

MSK-dan AzərTAc-a bildirmişlər ki, görüşdən məmnunluğunu diqqətə çatdıran Komissiyanın sədri Məzahir Pənahov Azərbaycan ilə Türkiyənin qardaşlığa və dostluğa əsaslanan münasibətlərinin bundan sonra da yüksələn xətlə inkişaf edəcəyinə əminliyini vurğulamışdır.

Səmimi qəbula görə minnətdarlığını bildirən səfir Azərbaycanda çalışdığı dövrdə dostluq və qardaşlıq münasibətlərinin daha da dərinləşməsi üçün bütün qüvvəsini sərf edəcəyini bildirmişdir. O, iki ölkənin seçki qurumları arasında yüksək səviyyəli əməkdaşlığın qurulması təşəbbüsü ilə çıxış etmişdir.

MSK sədri səfirə Azərbaycan Respublikasının seçki sistemi və seçki institutlarının fəaliyyəti barədə ətraflı məlumat vermişdir.

Görüşdə qarşılıqlı maraq doğuran digər məsələlər ətrafında da fikir mübadiləsi aparılmışdır.