Azərbaycan Respublikasının Vyetnam Sosialist Respublikasındakı səfiri Anar İmanov etimadnaməsini bu ölkənin Prezidenti Truong Tan Sanga təqdim etmişdir.

Xarici İşlər Nazirliyinin mətbuat xidmətindən AzərTAc-a bildirmişlər ki, A.İmanov Azərbaycan Prezidenti İlham Əliyevin salamlarını və xoş arzularını Vyetnam Prezidenti Truong Tan Sanga çatdırmışdır.

Diplomat Azərbaycanın Vyetnam ilə münasibətlərin inkişafına önəm verdiyini, qarşılıqlı əməkdaşlığın inkişaf etdirilməsi üçün geniş potensialın olduğunu vurğulamışdır. Səfir bu əlaqələrin daha da möhkəmləndirilməsi istiqamətində səy göstərəcəyini demişdir. 

Vyetnam Prezidenti salamlarının Prezident İlham Əliyevə çatdırılmasını xahiş etmiş və dövlətimizin başçısını ölkəsinə səfərə dəvət etmişdir.

 A.İmanovu Azərbaycanın Vyetnamda səfir təyin olunması münasibətilə təbrik edən Prezident Truong Tan Sang diplomata fəaliyyətində uğurlar arzulamışdır.

Ölkələrimiz arasında əməkdaşlığın dərin tarixi olduğunu qeyd edən Prezident Truong Tan Sang vurğulamışdır ki, Vyetnam bu əlaqələri daha da genişləndirməkdə maraqlıdır. Bildirilmişdir ki, Vyetnamın neft sektorunun inkişafında azərbaycanlı mütəxəssislər böyük rol oynayır.