İnternet informasiya vasitələrində yayılan böhtana görə cinayət

məsuliyyəti fikir azadlığının məhdudlaşdırılması deyildir.

Bu sözləri Azərbaycan Respublikası Prezidenti Administrasiyasının siyasi təhlil və informasiya təminatı şöbəsinin müdiri Elnur Aslanov mayın 17-də jurnalistlərə açıqlamasında demişdir.

E.Aslanov bildirmişdir ki, əgər kimsə tənqid deyil, təhqir edirsə, bu, cəzasız qala bilməz. Əks halda bu, anarxiyaya gətirib çıxara bilər. Burada söhbət qətiyyən nəzarətdən deyil, tənzimləmədən gedir ki, bu da bir çox dövlətlərdə mövcuddur. Bu gün informasiya texnologiyaları o dərəcədə inkişaf etmişdir ki, internetdə, İKT-də xüsusi nəzarətdən danışmaq çox çətindir. İstənilən halda rasist, millətçi, gənc nəslin mənəvi tərbiyəsinə ziyan verən məlumatların yayılması bütün sivil və inkişaf etmiş ölkələrdə məhdudlaşdırılır. ABŞ-da 1966-cı ildən kommunikasiyalarda əxlaq normaları qanunu müzakirə edilir, Avropa İttifaqı ölkələrində də bu məsələlərlə bağlı müəyyən qanunlar mövcuddur.

İnternetin çox sürətlə inkişaf edən bir məkan olduğunu deyən Elnur Aslanov vurğulamışdır ki, İKT günbəgün dəyişən sahədir. Bu baxımdan, heç bir dövlət onu müəyyən mənada tənzimlənməmiş buraxmaq istəmir.