“Münaqişənin həllinə dair danışıqlarda irəliləyişə nail olmaq lazımdır”

“Azərbaycan 20 illik müstəqilliyi ərzində təhsil, həyat səviyyəsinin yüksəlməsi, qadın hüquqlarının müdafiəsi, insan alverinə qarşı mübarizə sahəsində əhəmiyyətli uğurlar əldə etmişdir”. APA-nın məlumatına görə, bu fikirləri ATƏT-in Minsk qrupunun müvəqqəti həmsədri, ABŞ-ın ATƏT yanında missiyasının rəhbəri Yan Kelli ATƏT Daimi Şurasının toplantısında demişdir.

Həmsədr Azərbaycanı Birləşmiş Ştatların mühüm tərəfdaşı adlandırmışdır: “Biz Azərbaycanı uğurlu, demokratik, çiçəklənən, təhlükəsiz və suveren ölkə kimi görmək istəyirik”.

Çıxışında ATƏT-in Bakı Ofisinin statusu məsələsinə toxunan Yan Kelli bildirmişdir ki, bu ofis Azərbaycanda islahatlar proqramının həyata keçirilməsinə əhəmiyyətli töhfə vermişdir: “ABŞ indiki mandatın saxlanmasına və ATƏT-in Bakı Ofisinin fəaliyyətinə tam dəstək verdiyini bəyan edir. Ümidvarıq ki, Azərbaycan ofisin yerlərdə etibarlı şəkildə təmsilçiliyini təmin etməkdə davam edəcək. Biz hökuməti israrla konstruktiv dialoqa başlamağa və bu məsələni ATƏT-in iş qrafikinə uyğun olaraq vaxtında həll etməyə çağırırıq”.

Yan Kelli qeyd edib ki, dondurulmuş münaqişələrin nizamlanması prosesinə dəstək daim ATƏT-in gündəmində qalmalıdır: “ATƏT-in Minsk qrupunun həmsədri kimi Birləşmiş Ştatlar Dağlıq Qarabağ münaqişəsinin sülh yolu ilə nizamlanmasına nail olmaq üçün tərəflərlə sıx əlaqədə işi davam etdirəcək. Status-kvo vəziyyəti qəbul oluna bilməz. Danışıqlarda tərəqqiyə nail olmaq vacibdir”.