Mayın 15-də Yeni Azərbaycan Partiyasının (YAP) Xətai rayon təşkilatında partiyanın rayon və şəhər təşkilatları sədrlərinin iştirakı ilə respublika müşavirəsi keçirilmişdir.

Müşavirədə Yeni Azərbaycan Partiyasının sədr müavini-icra katibi, Milli Məclisin deputatı Əli Əhmədov çıxış etmişdir. Bildirilmişdir ki, YAP prezident seçkilərinə ciddi şəkildə hazırlaşır. Prezident seçkiləri ilə əlaqədar YAP müəyyənləşdirdiyi proqrama uyğun olaraq müvafiq tədbirlərini həyata keçirməkdədir. YAP-ın şaxələnmiş rayon təşkilatları mövcuddur. Ümumilikdə seçki hərəkətləri rayon təşkilatları vasitəsilə reallaşır.

Qeyd olunmuşdur ki, müşavirədə də seçki və seçkiyə hazırlıqla əlaqədar müəyyən tapşırıqlar veriləcəkdir. Tapşırıqların icrası ilə əlaqədar fikir mübadiləsi aparılacaqdır. Növbəti dövrdə həyata keçiriləcək işlər müzakirə olunacaqdır.

Bizim formalaşmış ənənəmiz ondan ibarətdir ki, seçkiyə hazırlıq prosesində YAP-ın bütün strukturlarının və üzvlərinin seçki kampaniyasında yaxından iştirakını təmin edək, - deyən Əli Əhmədov vurğulamışdır. Bildirilmişdir ki, hakim partiyanın 600 min fəal üzvünün seçki kampaniyasına hazırlığını təmin etmək üçün geniş proqram müəyyənləşdirilmişdir. Partiyanın bütün üzvləri Azərbaycanda seçki fəallığının artmasına müsbət təsir göstərəcəklər.

Müşavirədə ötən müddətdə görülən işlər və qarşıda duran məsələlər müzakirə edilmişdir.

AzərTAc