“Hesab edirəm ki, Qəbələnin Nic qəsəbəsində azərbaycanlılarla udilərin bir yerdə mehriban yaşaması çox gözəl faktdır. Azərbaycanda xristianlar, yəhudilər və müsəlmanların birlikdə dinc şəraitdə yaşaması ölkəniz üçün çox xoş və başucalığı gətirən bir faktdır”.

Bu sözləri Nic qəsəbəsinə səfər edərək qədim Alban kilsəsi ilə tanış olan və dini icmanın nümayəndələri ilə görüşən ABŞ-ın Azərbaycandakı səfiri Riçard Morninqstar APA-ya açıqlamasında demişdir: “Mənim Qəbələ rayonuna səfərim çox səmərəli oldu. Rayon rəhbərliyi ilə, ABŞ səfirliyinin maliyyə dəstəyi ilə ingilis dili öyrənən şagirdlərlə görüşüm, Qəbələdə keçirilən beynəlxalq incəsənət sərgisi və “Beltman” piano fabriki ilə, eləcə də Nic qəsəbəsində Alban kilsəsi ilə  tanışlığım, rayonun turizm potensialı, sosial-iqtisadi inkişafı ilə bağlı görülən işlər məndə xoş təəssüratlar yaratdı. Udi icmasının nümayəndələri ilə çox faydalı söhbətlər apardım. Udilərin Azərbaycanda min illərdir ki, dinc, əmin-amanlıq şəraitində yaşaması onu göstərir ki, ölkənizdə hər bir azsaylı xalq dilindən və dinindən asılı olmayaraq tolerantlıq və hörmət şəraitində yaşaya bilər. Azərbaycanda dövlət-din münasibətləri demokratik prinsiplərə və beynəlxalq hüquq normalarına uyğun tənzimlənir, hər bir kəsin dini etiqad azadlığı təmin olunur".

 Səfir Azərbaycanda mövcud olan zəngin mədəni irsin qorunub saxlanmasını yüksək qiymətləndirmişdir.

 Riçard Morninqstar ABŞ Dövlət Departamentində ATƏT-in Minsk qrupuna təyin ediləcək həmsədrin müəyyən olunması prosesi getdiyini bildirmişdir. Lakin o, yeni həmsədrin nə vaxt təyin olunacağına dair dəqiq tarix açıqlamamışdır: “Mən həmsədrin təyinatı ilə bağlı dəqiq tarixi deyə bilməsəm də, hazırda Vaşinqtonda bu istiqamətdə işlərin getdiyini söyləyə bilərəm. Bildiyiniz kimi ATƏT-in Minsk qrupunun həmsədri Robert Bradtke öz vəzifəsini başa çatdırdıqdan sonra bu vəzifəni səfir Yan Kelli icra edir. Mən onu uzun müddətdir tanıyıram. Yeni həmsədr təyin olunana qədər bu vəzifəni Yan Kelli icra edəcək”.