Türk Şurasının III zirvə toplantısı Azərbaycanda keçiriləcək.

APA-nın məlumatına görə, toplantının avqustun 15-də keçirilməsi nəzərdə tutulmuşdur. Bir gün sonra isə Türk Şurasına daxil olan ölkələrin xarici işlər nazirlərinin görüşü baş tutacaq.

İştirakçı ölkələrin dövlət və hökumət başçıları quruma üzv ölkələr (Azərbaycan, Türkiyə, Qazaxıstan, Qırğızıstan) arasında münasibətləri daha da gücləndirmək istiqamətində müzakirələr aparacaqlar. Sammit çərçivəsində müxtəlif sazişlər imzalanacaq.

Qeyd edək ki, Türk Şurasının II zirvə toplantısı ötən il Bişkekdə keçirilmişdir. Həmin toplantıda Türkiyə prezidenti Abdullah Gül, Qırğızıstan prezidenti Almazbek Atambayev, Qazaxıstan prezidenti Nursultan Nazarbayev, Azərbaycanın baş naziri Artur Rasizadə və Türkmənistan Elmlər Akademiyasının prezidenti Burbanmirat Mezilov iştirak etmişdilər.