Mayın 3-də Azərbaycan Diplomatik Akademiyasında (ADA) Avropa İttifaqının (Aİ) genişlənmə və Avropa Qonşuluq Siyasəti üzrə komissarı Ştefan Fülenin məruzəsi dinlənilmişdir.

Tədbirdə ADA-nın müəllim və tələbə heyəti, Azərbaycanda fəaliyyət göstərən Diplomatik korpusların və KİV-lərin nümayəndələri iştirak etmişlər.

Aİ ilə Azərbaycanın əlaqələrindən danışan Ş.Füle bildirmişdir ki, qurum ölkəmizi terrorizmə qarşı mübarizə, enerji, təhsil və digər sahələrdə etibarlı tərəfdaş hesab edir. Azərbaycan məkanı, zəngin resursları, insanları, enerji ehtiyatları və investisiya imkanları ilə Aİ üçün mühüm rol oynayır, - deyən komissar vurğulamışdır ki, Aİ ilə Azərbaycan arasında münasibətlər qarşılıqlı hörmət və ümumi maraqlara əsaslanır.

Aİ-nin “Şərq tərəfdaşlığı” Proqramına böyük maraq göstərdiyini deyən Ş.Füle bildirmişdir ki, bu gün Aİ dünyanın böyük ticarət ortaqlarından, qlobal iqtisadiyyata böyük yatırımlar edən qurumlardan biridir.

“Şərq tərəfdaşlığı” Proqramının üzvü olan ölkələrinin mübahisəli məsələlərinə toxunan Ş.Füle bu problemlərin bir çox maneələr yaratdığını, onların sülh yolu ilə həll edilməsinin vacibliyini vurğulamışdır.

Təhsil sahəsində əməkdaşlıqdan danışan Ş.Füle Azərbaycanda həyata keçirilən təhsil proqramlarına Aİ-nin üzvü olan ölkələrindən daha çox tələbələrin cəlb ediləcəyinə əminliyini bildirmişdir.

Sonda Aİ-nin komissarı sualları cavablandırmışdır.

AzərTAc