Yaxın günlərdə Polşanın Krakov şəhərində Azərbaycan və Ermənistan xarici işlər nazirlərinin görüşü  keçiriləcəkdir. Bu barədə Azərbaycanın xarici işlər naziri Elmar Məmmədyarov aprelin 26-da keçirilən mətbuat konfransında məlumat vermişdir.

E.Məmmədyarov demişdir: “Azərbaycan  Dağlıq  Qarabağ münaqişəsinin  həllinə  dair  geniş əhatəli  sülh sazişinə hazırdır. Mən həmin münaqişə üzrə  danışıqlarda tərəqqinin olmaması barədə Rusiya XİN-in başçısı Sergey Lavrovun dünənki bəyanatı ilə tam razıyam.  Azərbaycan ilə Ermənistan  uzun müddətdir onun həllinə dair danışıqlar aparırlar, lakin danışıqlar prosesi  indiyədək nəzərəçarpacaq nəticələr verməmişdir: çoxlu sayda görüşlər keçirilir, lakin biz həmin danışıqların  məntiqi nəticələrini müşahidə etmirik.

Krakov görüşünün gündəliyində Azərbaycan ilə Ermənistan arasında müzakirə ediləcək xeyli sayda məsələ, o cümlədən məcburi  köçkünlərin geri qaytarılması, statusun müəyyənləşdirilməsi və bir çox başqa məsələlər olacaq”.

AzərTAc