Aprelin 30-da Vaşinqtondakı Karnegi Fondunda “Azərbaycan, Gürcüstan, Türkiyə: Yaranmaqda olan strateji alyansın təməl və çağırışları” mövzusunda konfrans keçiriləcək. APA-nın məlumatına görə, konfrans Ceymstaun Fondu və Azərbaycan Prezidenti yanında Strateji Araşdırmalar Mərkəzi tərəfindən birgə təşkil olunur.

 Asiya Araşdırmaları Mərkəzinin strategiya və milli inkişaf bürosunun icraçı direktoru Enders Uimbusun (Enders Wimbush) moderator olacağı “Strateji alyansın məqsədləri və perspektivləri” adlı paneldə Azərbaycan XİN-in mətbuat katibi Elman Abdullayev “Azərbaycanın perspektivləri” mövzusunda çıxış edəcək. Paneldə “Turkish Policy” dərgisinin baş redaktoru Nigar Göksel və Amerika Universitetinin Qara Dəniz-Xəzər Dənizi Araşdırmalar Mərkəzinin direktoru Mamuka Sereteli də çıxış edəcəklər.

“Qərbin maraqları və Azərbaycan-Gürcüstan-Türkiyə üçbucağı” adlı paneldə isə Ceymstaun Fondunun baş elmi işçisi Vladimir Sokor, SAM-ın iqtisadi təhlil və qlobal məsələlər üzrə departamentinin rəhbəri Vüsal Qasımlı, SAM-ın xarici siyasətin təhlili departamentinin rəhbəri Rövşən İbrahimovun çıxışları planlaşdırılmışdır. Panelin moderatoru “Caucasus International” jurnalının baş redaktoru Zaur Şiriyev olacaq.