Azərbaycanın xarici işlər naziri Elmar Məmmədyarov İsrailə səfəri çərçivəsində bu ölkənin Prezidenti Şimon Peres ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, Prezident Şimon Peres Azərbaycanı böyük potensiala və parlaq gələcəyə malik bir dövlət kimi dəyərləndirmiş, ölkəmizin sürətlə inkişaf etdiyini vurğulamışdır. Qeyd edilmişdir ki, regionun aparıcı ölkəsi olan Azərbaycanda tolerantlıq yüksək səviyyədədir.

Azərbaycana 2009-cu ildəki səfərini xoş təəssüratlarla xatırladığını deyən İsrail Prezidenti Şimon Peres ölkəmizin bu gün dünya arenasında böyük nüfuz qazanmasında və yerləşdiyi regionun lider dövlətinə çevrilməsində ümummilli lider Heydər Əliyevin müstəsna rolunu vurğulamışdır. Azərbaycan Prezidenti İlham Əliyevin həyata keçirdiyi uzaqgörən siyasəti yüksək qiymətləndirən Prezident Şimon Peres ölkəmizi böyük tarix və gözəlliyin təcəssüm olunduğu yer kimi səciyyələndirmişdir. Azərbaycanın terrorizmə qarşı mübarizədə mövqeyi yüksək qiymətləndirilmişdir.

Ölkələrimiz arasında müxtəlif sahələrdə münasibətlərin inkişaf etdiyini vurğulayan E.Məmmədyarov regionda cərəyan edən hadisələr, xüsusilə Ermənistan-Azərbaycan, Dağlıq Qarabağ münaqişəsinin həlli prosesi barədə ətraflı məlumat vermişdir. Bildirilmişdir ki, Azərbaycanın işğal olunmuş ərazilərində Ermənistan tərəfindən azərbaycanlı əhaliyə qarşı etnik təmizləmə siyasəti aparılır və Ermənistan BMT Təhlükəsizlik Şurasının qəbul etdiyi məlum qətnamələrə riayət etmir.

Tolerantlığın Azərbaycanda əsrlər boyu mövcud olmasının vurğulandığı görüşdə qarşılıqlı maraq doğuran bir sıra məsələlərlə bağlı da fikir mübadiləsi aparılmışdır.