Aprelin 19-da Dövlət Gömrük Komitəsində (DGK) İran İslam Respublikasının ölkəmizdəki səfiri Möhsün Pak Ayinin rəhbərlik etdiyi nümayəndə heyəti ilə görüş keçirilmişdir.

  DGK-dan AzərTAc-a bildirilmişdir ki, görüşdə Azərbaycan-İran əlaqələrinin hazırki durumu, mövcud imkanlar və perspektivlər barədə ətraflı fikir mübadiləsi aparılmışdır.

DGK-nın  sədri Aydın Əliyev ölkələrimiz arasında ikitərəfli münasibətlərin uğurla inkişaf etdiyini, o cümlədən gömrük sahəsində qarşılıqlı əməkdaşlığın yüksək səviyyədə olduğunu bildirmişdir.  İki ölkə arasında ticarətin genişləndirilməsi, “Aslandüz-Horadiz” sərhəd-keçid məntəqəsinin fəaliyyətinin bərpa edilməsi istiqamətində işlərin intensivləşdirilməsinin vacibliyi vurğulanmışdır.

Möhsün Pak Ayin iki ölkənin sərhəd-gömrük buraxılış məntəqələri əməkdaşlarının işgüzar görüşlərinin keçirilməsinin, bu məntəqələrdə vətəndaşların rahat gediş-gəlişinə mane ola biləcək problemlərin yerindəcə həll edilməsinin, ölkələrimizin gömrük sahəsi üzrə mövcud qanunvericiliklərinin daha dərindən mənimsənilməsi üçün birgə treninqlərin təşkilinin zəruriliyini qeyd etmişdir.

Səfir İran İslam Respublikası Gömrük Administrasiyasının rəhbəri Abbas Memarnejadın rəsmi dəvətini Aydın Əliyevə çatdırmışdır.