ABŞ Silahlı Qüvvələrinin mətbuat xidməti (American Force Press Service) Azərbaycanla ABŞ arasında müdafiə sahəsində hərbi əməkdaşlıqdan bəhs edən mətbuat buraxılışı dərc etmişdir.

Azərbaycanın ABŞ-dakı səfirliyindən Trend-ə verilən məlumata görə, buraxılışda bu ilin 12 aprel tarixində Azərbaycanın ABŞ-dakı səfiri Elin Süleymanovun Müdafiə Nazirliyinin Müdafiə sahəsində Təhdidlərin Azaldılması Agentliyinin (MTAA/DTRA) direktoru Kennez Mayers ilə agentliyin Virciniyadakı mənzil - qərargahında keçirilmiş görüşündən bəhs edilir, direktorun Azərbaycanla indiyədək mövcud olan müsbət əməkdaşlıq təcrübəsinə istinadən səsləndirdiyi fikirlər yer alır.

Rəhbərlik etdiyi qurumla Azərbaycan arasında indiyədək uğurlu əməkdaşlıq təcrübəsindən bəhs edən agentliyin direktoru demişdir: “Bizim Azərbaycanla olan layihələrimiz üzrə əməkdaşlıq çox yaxşıdır və bizim uzunmüddətli uğurlu əməkdaşlığımız mövcuddur.

Bu tipli görüşlərin mütəmadi olmasının hazırda mövcud olan əməkdaşlığın dərinləşdirilməsi və genişləndirilməsi baxımından əhəmiyyətli olduğunu vurğulayan Mayers Azərbaycanın çətin və özünəməxsus təhükəsizlik mühitinə malik olduğunu bildirmişdir. O, belə görüşlərin ikitərəfli tərəfdaşlığın genişləndirilməsi üçün əlavə imkanlar yaradacağını qeyd etmişdir.

Mətbuat buraxılışında daha sonra Azərbaycanın Əfqanıstanda beynəlxalq təşəbbüslərə verdiyi töhfələrdən, o cümlədən ölkəmizin Əfqanıstanın təchizat xətlərinin şaxələndirilməsindəki əhəmiyyətli rolundan danışılır.

“Azərbaycan kütləvi qırğın silahlarının yayılmasına qarşıdır və bizim hökumətin yayılmamaya verdiyi dəstək mütləq və dəyişməzdir”, -deyə azərbaycanlı diplomat ABŞ-ın müdafiə quruculuğunda Azərbaycana verdiyi töhfələri, o cümlədən agentlik çərçivəsində aparılmış fəaliyyəti yüksək dəyərləndirmişdir.

MTAA direktoru Azərbaycanla ABŞ arasında yayılmama sahəsində olan əməkdaşlığı gələcək üçün model adlandırmışdır.

Agentliyin Azərbaycanla əməkdaşlığı 2004-cü ildən başlamışdır. Kütləvi qırğın silahlarının yayılmaması və bioloji təhdidlərin azaldılması istiqamətində əməkdaşlıq uğurla davam etdirilir.