Amerika Birləşmiş Ştatları Dövlət Departamentinin Qafqaz və regional konfliktlər üzrə struktur bölməsinin rəhbəri Castin Fridmanın rəhbərlik etdiyi nümayəndə heyəti aprelin 15-də Gəncədə olmuşdur.

AzərTAc xəbər verir ki, şəhər icra hakimiyyətində keçirilən görüşdə icra hakimiyyətinin başçısı Elmar Vəliyev qonaqlara qədim Nizami yurdu haqqında ətraflı məlumat vermiş, burada həyata keçirilən infrastruktur layihələrdən, dövlətimizin başçısının imzaladığı regionların sosial-iqtisadi inkişafı Dövlət Proqramı çərçivəsində görülən işlərdən danışmışdır.

ABŞ Dövlət Departamentinin Qafqaz və regional konfliktlər üzrə struktur bölməsinin rəhbəri Castin Fridman həyata keçirilən bütün bu tədbirlərdən məmnunluğunu bildirmişdir.

Görüşdə bir sıra aktual məsələlər - qeyri-hökumət təşkilatlarının fəaliyyətinə yaradılan şərait, şəffaflığın təmin edilməsi istiqamətində  görülmüş işlər, narkotiklərə və insan alverinə qarşı mübarizənin səmərəliliyinin artırılması ilə bağlı qarşıda duran vəzifələr ətrafında fikir mübadiləsi aparılmışdır.

ABŞ Dövlət Departamentinin Qafqaz və regional konfliktlər üzrə struktur bölməsinin rəhbəri Castin Fridman Gəncəyə səfərindən,  burada keçirdiyi görüşdən razı qaldığını bildirmişdir.