Rusiya hərbçilərinin Qəbələ Radiolokasiya Stansiyasını (RLS) tam tərk etməsi avqust ayınadək başa çatacaq.

APA-nın məlumatına görə, bu barədə Rusiya müdafiə nazirinin müavini Anatoli Antonov bildirmişdir.

Onun sözlərinə görə, Qəbələ RLS-in təhvil-təslimi ilə bağlı işlər Azərbaycan-Rusiya komissiyaları çərçivəsində davam edir: “Əmlakın inventarlaşdırılmasını nəzərdə tutan birinci mərhələ artıq başa çatmışdır. İkinci mərhələdə bizim hərbçilərimizin və yüklərin Azərbaycan Daxili Qoşunlarının mühafizəsi altında Rusiyaya ötürülməsi həyata keçiriləcək. Bütün işlər bu ilin avqustuna qədər qurtarmış olmalıdır”.

Qeyd edək ki, Azərbaycan tərəfinin icarə haqqını artırması ilə əlaqədar Rusiya 2012-ci ilin dekabr ayından Qəbələ RLS-də fəaliyyətini dayandırmışdır. Azərbaycan tərəfi Rusiyadan stansiyanın icarəsi üçün 300 milyon dollar icarə haqqı tələb etmişdi.