Brüsseldə Azərbaycanla Avropa Birliyi arasında

assosiativ saziş üzrə danışıqların növbəti raundu keçirilmişdir

Azərbaycan xarici işlər nazirinin müavini Mahmud Məmmədquliyev Brüsselə səfəri çərçivəsində Avropa Birliyinin genişlənmə və Avropa qonşuluq siyasəti üzrə komissarı Ştefan Füle ilə görüşmüşdür.

APA-nın AB-nin mətbuat mərkəzinə istinadən yaydığı məlumata görə, görüşdə tərəflər Azərbaycan-AB münasibətlərini müzakirə etmişlər. Ştefan Füle bildirmişdir ki, Azərbaycanda baş verən hadisələr Azərbaycan-AB münasibətlərinə müəyyən təsir göstərir. İkitərəfli münasibətlərin mühiti yaxşılaşmışdır.

 Azərbaycan tərəfi isə öz növbəsində ümidvar olduğunu bildirmişdir ki, AB ilə Azərbaycan arasında münasibətlər strateji mahiyyət daşıyacaq.

 Azərbaycanla viza rejiminin sadələşdirilməsi və readmissiya haqqında danışıqların yaxşı davam etdiyini qeyd edən Ştefan Füle yanvarda Ümumi Aviasiya Məkanı sazişinə dair danışıqlarda da tərəqqi əldə olunduğunu demişdir.

Dağlıq Qarabağ münaqişəsinin nizamlanması prosesində tərəqqiyə nail olunmasının zəruriliyini vurğulayan Ştefan Füle tərəfləri münaqişənin eskalasiyasına gətirib çıxaracaq hərəkət və bəyanatlardan çəkinməyə çağırmışdır.

Qeyd edək ki, Mahmud Məmmədquliyev Azərbaycanla AB arasında assosiativ saziş üzrə danışıqlarda ölkəmizin nümayəndə heyətinə rəhbərlik edir. Danışıqların növbəti raundu aprelin 9-da Brüsseldə keçirilmişdir.