Azərbaycanın xarici işlər naziri Elmar Məmmədyarov Rumıniya Prezidentinin müşaviri Yulian Kifunu ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə ikitərəfli münasibətlərin səviyyəsindən məmnunluq ifadə olunmuşdur.

Ölkələrimizin beynəlxalq təşkilatlar çərçivəsində uğurla əməkdaşlıq etdiklərinin diqqətə çatdırıldığı görüşdə bu işbirliyinin davam etdirilməsinin əhəmiyyəti vurğulanmışdır. Həmçinin Avropa İttifaqı-Azərbaycan münasibətlərinə dair fikir mübadiləsi də aparılmışdır.

Nazir Elmar Məmmədyarov Azərbaycan iqtisadiyyatının sürətli inkişafı nəticəsində ölkə vətəndaşlarının sosial rifahının yüksəldiyini diqqətə çatdırmışdır.

Yulian Kifu ölkəmizdə dinamik iqtisadi inkişafın müşahidə olunduğunu bildirmişdir.

Görüşdə, həmçinin regionda gedən proseslər və qarşılıqlı maraq doğuran məsələlər ətrafında fikir mübadiləsi aparılmışdır.