ABŞ-ın Nyu-Cersi ştatının  Assambleyası martın 31-ni Azərbaycanlıların soyqırımı qurbanlarının xatirə günü kimi tanıyan qətnamə qəbul etmişdir. 

Sənəddə deyilir ki, silahlı erməni daşnak-bolşevik dəstələri 1918-ci ilin martında Bakı, Quba və Şamaxıda, habelə Bakı quberniyasının digər yaşayış məntəqələrində dinc azərbaycanlılara divan tutmuşdur. Təkcə Bakı şəhərində 12 mindən çox azərbaycanlı qətlə yetirilmişdi.

Assambleyanın sədri Şeyla Oliver tərəfindən imzalanmış qətnamə  Amerika Azərbaycan Cəmiyyətinin sədri Tomris Azəriyə təqdim edilmişdir.

Qətnamədə deyilir ki, 1918-ci ilin mart hadisələri zamanı 20 mindən çox azərbaycanlı qətlə yetirilmişdir. Azərbaycanlıların soyqırımını “dünya  tarixində ən çox qınanan qanlı azğınlıqlardan biri” adlandıran Nyu-Cersi parlamentinin deputatları Azərbaycanın şəhər və kəndlərində misli görünməmiş vəhşiliklər törətmiş silahlı daşnak-bolşevik dəstələrinin hərəkətlərini pisləmişlər.

 Yusif BABANLI

AzərTAc

Vaşinqton