Martın 13-də Almaniyanın ölkəmizdəki səfiri Herbert Kvelle Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan 1 saylı Bakı “ASAN xidmət” mərkəzinin fəaliyyəti ilə  tanış olmuşdur.

Dövlət Agentliyinin sədri İnam Kərimov 1 saylı Bakı “ASAN xidmət” mərkəzinin yaradılması, onun məqsədləri, xidmət növləri, həmçinin gələcək planlarına dair ətraflı məlumat vermişdir. Sədr bildirmişdir ki, “ASAN xidmət” mərkəzinin fəaliyyətinin məqsədi dövlət orqanlarının hüquqi xidmətlərinin göstərilməsində vətəndaşların rahatlığının, şəffaflığın təmin edilməsi, korrupsiya hallarının istisna edilməsi, müasir texnologiyaların, “vahid məkan” prinsipinin tətbiq edilməsi, dövlət qulluqçusu-vətəndaş münasibətlərində yeni düşüncə tərzinin - “dövlət qulluqçusunun vəzifəsi vətəndaşın hüququnu təmin etməkdir” yanaşmasının formalaşdırılmasıdır.

Azərbaycan ilə Almaniya arasında uğurlu əməkdaşlığı xüsusi qeyd edən səfir H.Kvelle yeni yaradılmış agentliyin bu əlaqələrin genişləndirilməsində mühüm rol oynayacağına əminliyini bildirmişdir.

 “ASAN xidmət” mərkəzində yaradılmış şəraiti və əməkdaşların peşəkarlığını yüksək qiymətləndirən almaniyalı diplomat onlara işlərində uğurlar arzulamışdır.

AzərTAc