Azərbaycanın Tacikistandakı səfiri Abbasəli Həsənov martın 11-də bu ölkənin Ali Məhkəməsinin sədri Nusratullo Abdulloyev ilə görüşmüşdür.

Səfirlikdən  bildirmişlər ki, görüşdə Azərbaycan ilə Tacikistan arasında məhkəmə fəaliyyəti və iki ölkənin müvafiq qurumları arasında münasibətlərin dərinləşdirilməsi sahəsində ikitərəfli əməkdaşlıq məsələləri müzakirə edilmişdir. 

Səfir A.Həsənov iki ölkənin məhkəmə orqanları arasında təcrübə mübadiləsinin və əməkdaşlığın inkişaf etdirilməsinin vacibliyini vurğulamışdır. Prezident Emoməli Rahmonun ötən il Azərbaycana rəsmi səfərinin əhəmiyyətindən danışan A.Həsənov səfər çərçivəsində bir çox məsələlərin həll olunduğunu diqqətə çatdırmışdır. Bildirilmişdir ki, Azərbaycanın müstəqilliyinin bərpasından sonra digər sahələrdə olduğu kimi, məhkəmə sisteminin də inkişafı üçün geniş islahatlar həyata keçirilmişdir.

N.Abdulloyev ölkələrimiz arasında münasibətlərin bütün sahələrdə inkişafının, Ali məhkəmələr arasında təcrübə mübadiləsinin aparılmasının vacibliyini vurğulamışdır. O, qardaş və dost ölkələrimiz arasında ikitərəfli münasibətlərin hazırkı səviyyəsindən məmnunluğunu bildirmiş, Tacikistanda hüquq sahəsində əldə olunan nailiyyətlərdən danışmışdır.

Səfir A.Həsənov N.Abdulloyevi Azərbaycana səfərə dəvət etmişdir.

Dəvət məmnunluqla qarşılanmışdır.

AzərTAc