Yunanıstan xarici işlər nazirinin müavini Dimitris Kurkulasın ölkəmizə səfəri çərçivəsində martın 7-də Bakıda Azərbaycan-Yunanıstan işgüzar görüşü keçirilmişdir.

Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə keçirilən tədbirdə Yunanıstanın qida sənayesi, turizm, səhiyyə, əczaçılıq, tikinti və dizayn, aviasiya, kabel, paltar, xəz, işıqlandırma sistemləri və digər sektorları təmsil edən şirkətlər iştirak etmişlər.

AZPROMO-nun prezidenti vəzifəsinin icraçısı Rüfət Məmmədov ölkəmizin iqtisadiyyatı, yaradılmış əlverişli biznes və investisiya mühiti barədə danışmış, iki ölkə arasında iqtisadi və ticarət əlaqələrinin inkişafının əhəmiyyətini vurğulayaraq, iş adamlarını fəal əməkdaşlığa dəvət etmişdir.

Yunanıstan-Azərbaycan Ticarət Palatasının rəhbəri George Papadopoulos vurğulamışdır ki, bu cür işgüzar görüşlərin keçirilməsi iki ölkə sahibkarları arasında əlaqələrin inkişafına təkan verir və bunu məqsədəuyğun hesab edirik.

Tədbirdə, həmçinin Yunanıstandan gəlmiş 40 şirkətin nümayəndələri ilə ikitərəfli görüşlər təşkil edilmişdir.

Görüşdə Azərbaycan tərəfindən 100-ə yaxın şirkət iştirak etmişdir.