Xəbər verdiyimiz kimi, Azərbaycan Respublikası Milli Məclisi sədrinin birinci müavini Ziyafət Əsgərovun başçılıq etdiyi parlament nümayəndə heyəti Çin Xalq Respublikası (ÇXR) Siyasi Məşvərət Şurasının Ümumçin Komitəsinin dəvəti ilə bu ölkədə rəsmi səfərdədir.

Nümayəndə heyəti paytaxt Pekində görüşləri başa çatdırdıqdan sonra Çinin Şaansi vilayətinin paytaxtı Sian şəhərində və dünyanın maliyyə mərkəzlərindən biri olan Şanxay şəhərində olmuşdur.

ÇXR Siyasi Məşvərət Şurasının Şaansi Komitəsinin sədr müavini Lyu Sinven və Şanxay Komitəsinin sədr müavini Gou Taytunq ilə görüşlərdə iki ölkə arasında əlaqələrin tarixinə nəzər salınmışdır. Bildirilmişdir ki, hələ qədim İpək yolu dövründə təməli qoyulmuş Çin-Azərbaycan əlaqələrinin  müasir dövrdə yeni müstəvidə inkişafı üçün böyük imkanlar vardır. 

Qeyd olunmuşdur ki, hər iki tərəf əməkdaşlığa böyük önəm verir. Ölkələrimiz arasında əlaqələrin inkişafında ümummilli lider Heydər Əliyevin və Prezident İlham Əliyevin Çinə səfərlərinin rolu vurğulanmışdır.

Görüşlərdə dünyanın ən böyük 2-ci iqtisadiyyatına sahib olan Çinin iqtisadi inkişafından söz açılmışdır.

Milli Məclis sədrinin birinci müavini Ziyafət Əsgərov Azərbaycanın dinamik inkişafı, son illər qazanılmış uğurlar barədə danışmışdır.

Tərəflər iki ölkə arasında əlaqələrin müxtəlif sahələrinə – siyasi, iqtisadi, mədəni istiqamətlərə dair fikir mübadiləsi aparmışlar. Qeyd olunmuşdur ki, parlamentlərarası əlaqələrin inkişafında qarşılıqlı səfərlərin rolu böyükdür.

Nümayəndə heyətinə deputatlar Siyavuş Novruzov, Əliağa Hüseynov, Rauf Əliyev və Əli Məsimli daxildirlər.

Şahin CƏFƏROV,
AzərTAc-ın xüsusi müxbiri
Şanxay