Azərbaycanın Tacikistandakı səfiri Abbasəli Həsənov bu ölkənin Dini Məsələlər üzrə Komitəsinin sədri Abdurahim Xalikovlaiki ilə görüşmüşdür. Görüşdə bu sahədə ölkələrimiz arasında əlaqələrin daha da genişləndirilməsinin vacibliyi vurğulanmışdır.

A.Həsənov Azərbaycan xalqının ümummilli lideri Heydər Əliyevin və onun layiqli davamçısı Prezident İlham Əliyevin islam dininə göstərdiyi qayğıdan danışmış, bu sahədə görülmüş işlər barədə məlumat vermişdir.

Qeyd olunmuşdur ki, Bakıda Bibiheybət, Təzəpir məscidləri, Gəncədə İmamzadə Ziyarətgah Kompleksi dövlət tərəfindən əsaslı təmir olunmuşdur.

Səfir bildirmişdir ki, tolerantlıq baxımından Azərbaycan nümunəvi bir ölkədir. Bu gün Azərbaycanda sinaqoq, katolik və pravoslav kilsələri heç bir təzyiqə məruz qalmadan sərbəst fəaliyyət göstərir.

Komitə sədri Tacikistanda sön dövrlərdə tikilən məscidlərin sayının çoxaldığını, dövlət başçısı Emoməli Rəhmonun din məsələlərinə xüsusi qayğı ilə yanaşdığını bildirmişdir.

Səfir Qafqaz Müsəlmanları İdarəsinin sədri, şeyxülislam Allahşükür Paşazadənin və Dini Qurumlar üzrə Dövlət Komitəsinin sədri Elşad İsgəndərovun salamlarını Abdurahim Xalikovlaikiyə çatdırmış, bu il aprelin 16-17-də Bakıda keçiriləcək “MDB ölkələrinin müsəlmanları: sülh və əmin-amanlıq uğrunda” adlı konfransa dəvəti təqdim etmişdir. Komitə sədri dəvəti məmnunluqla qəbul etmişdir.

Qulu KƏNGƏRLİ,
AzərTAc-ın xüsusi müxbiri
Düşənbə