Bu il keçiriləcək Milli Məclisə seçkilərlə əlaqədar Mərkəzi Seçki Komissiyası və Avropa Şurası Venesiya Komissiyası birgə seminar-treninqə başlamışlar. Seminarda seçkilərlə bağlı şikayət və müraciətlərə baxılması məsələləri müzakirə olunur.
Tədbirdə 125 seçki dairəsinin nümayəndələri, yerli və beynəlxalq ekspertlər iştirak edirlər. Mərkəzi Seçki Komissiyasının katibi Natiq Məmmədov bildirmişdir ki, komissiya şikayətlərə baxılması qaydaları ilə bağlı beynəlxalq təşkilatlar və Venesiya Komissiyası ilə daim əməkdaşlıq edir. Seçkilərin istənilən mərhələsində seçicilərin hüququ var ki, şikayət və müraciət etsinlər. Şikayətlərə baxılma forması haqqında təlimat hazırlanmışdır.
Parlament seçkilərində namizədlərin qeydə alınması dairələrdə həyata keçiriləcəkdir. Aşağı seçki komissiyaların əsas vəzifəsi seçki prosesini qanunvericiliyin və təlimatların tələblərinə uyğun aparmaqdır.
Avropa Şurası baş katibinin Azərbaycandakı xüsusi nümayəndəsi xanım Veronika Kotek seminarın əhəmiyyətli olacağını demişdir. Avropa Şurasının ekspertləri şikayət və müraciətlərə baxılma qaydaları ilə bağlı məlumat vermişlər.
İki gün davam edəcək tədbirdə məruzələrlə yanaşı, diskussiyalar da təşkil olunacaqdır.{nl}