“Biz belə danışıqları tanımırıq və onların belə danışıqlar aparmağa hüququ yoxdur”. APA-nın məlumatına görə, bu sözləri Azərbaycan Prezidenti Administrasiyası rəhbərinin müavini Novruz Məmmədov “AzərRos”un sabiq prezidenti Söyün Sadıxovun Moskvada azərbaycanlı və erməni icmalarının nümayəndələrinin görüşünün keçirilməsi təşəbbüsünə münasibət bildirərkən  demişdir.

Novruz Məmmədov qeyd etmişdir ki, Azərbaycan hökuməti heç bir diaspor qurumuna danışıqlar aparmağa səlahiyyət verməmişdir: “Düşünürəm ki, onlar müəyyən təsir altında, yaxud da müəyyən cəlbedici, şirnikləndirici proseslər nəticəsində bu əlaqələri qurur və danışıqlar apardıqlarını  iddia edirlər. Lakin belə danışıqların hüquqi, siyasi və digər əsası yoxdur, ola da bilməz”.