“Ermənistan, Azərbaycan və Gürcüstanda seçkilərin beynəlxalq standartlara və ATƏT-in bundan öncəki tövsiyələrinə uyğun keçirilməsi vacibdir”

Avropa Birliyinin xarici əlaqələr şurasının fevralın 18-də Brüsseldə keçirilən iclasında “Şərq Tərəfdaşlığı” sammiti və proqram çərçivəsində keçiriləcək üçüncü sammitlə əlaqədar məsələlər müzakirə olunmuşdur.

APA-nın xəbərinə görə, iclasın yekununda qəbul edilmiş sənəddə deyilir ki, “Şərq Tərəfdaşlığı”nın əsasında beynəlxalq hüquqa və fundamental dəyərlərə, demokratiyaya, qanunun aliliyinə sadiqlik dayanır. Bu səbəbdən AB proqram ölkələrində bu sahədə aparılan islahatları dəstəkləyir: “Vilnüs sammiti ərəfəsində AB Şurası bəyan edir ki, əməkdaşlığın intensivliyini bu islahatların tempi müəyyənləşdirəcək, daha fəal islahat aparan tərəfdaş ölkələr AB ilə münasibətlərdə daha çox fayda görəcək. Bu kontekstdə Şura 2013-cü ildə Ermənistan, Azərbaycan və Gürcüstanda seçkilərin beynəlxalq standartlara və ATƏT-in Demokratik Təsisatlar və İnsan Haqları Bürosunun bundan öncəki tövsiyələrinə uyğun keçirilməsinin vacibliyini qeyd edir”.

 Şura Azərbaycanla assosiasiya sazişinin imzalanması ilə bağlı aparılan danışıqlarda əldə olunan tərəqqini, eləcə də viza rejiminin sadələşdirilməsi üzrə bəzi “Şərq Tərəfdaşlığı” ölkələrinin nail olduğu tərəqqini alqışlamışdır: “Azərbaycanla viza rejiminin sadələşdirilməsi və readmissiya üzrə aparılan  danışıqlarda da inkişaf müşahidə olunur və Şura Vilnüsdəki görüşə qədər bu danışıqların yekunlaşacağına ümid edir”.

 Xatırladaq ki, “Şərq Tərəfdaşlığı” proqramı çərçivəsində 3-cü zirvə toplantısı bu ilin noyabrında Litva paytaxtında keçiriləcək.