Fevralın 15-də xarici işlər naziri Elmar Məmmədyarov İtaliya xarici işlər nazirinin müavini xanım Marta Dassunun başçılıq etdiyi nümayəndə heyəti ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə Elmar Məmmədyarov Azərbaycan-İtaliya ikitərəfli əlaqələrinin yüksək səviyyəyə çatdığını vurğulamış, müxtəlif sahələrdə, xüsusilə enerji sahəsində əməkdaşlığın genişləndirilməsi üçün yaxşı perspektivlərin olduğunu qeyd etmişdir. Nazir, həmçinin ikitərəfli münasibətlərin dərinləşdirilməsi baxımından yüksək səviyyəli səfərlərin əhəmiyyətini vurğulamışdır.

 Ermənistan-Azərbaycan, Dağlıq Qarabağ münaqişəsindən bəhs edən xarici siyasət idarəsinin rəhbəri regionda davamlı sülh və sabitliyin təmin olunması üçün Ermənistan silahlı qüvvələrinin işğal altındakı ərazilərimizdən çıxarılmasının vacibliyini bildirmiş, Minsk qrupunun vasitəçilik səylərinin artırılmasının əhəmiyyətini qeyd etmişdir.

Marta Dassu Azərbaycana səfərindən razılığını bildirmiş və iki ölkə arasındakı münasibətlərin mövcud səviyyəsindən məmnunluğunu diqqətə çatdırmışdır. İtaliyanın Azərbaycan ilə bütün sahələrdə əməkdaşlığı genişləndirməkdə maraqlı olduğunu vurğulayan qonaq ölkəmizin Avropanın enerji təchizatında mühüm rolunu qeyd etmişdir.

Görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparılmışdır.