UNESCO-nun Parisdəki baş qərargahında Azərbaycan Respublikasının Gənclər və İdman Nazirliyi ilə təşkilat arasında Bədən Tərbiyəsi və İdman üzrə Hökumətlərarası Komitənin (CİGEPS) fövqəladə iclasının bu il martın 13-dən 15-dək  Bakı şəhərində keçirilməsinə dair razılaşma sənədinin imzalanması mərasimi olmuşdur.

 Görüşdə Azərbaycan tərəfindən gənclər və idman nazirinin müavini İsmayıl İsmayılov, beynəlxalq əlaqələr şöbəsinin aparıcı məsləhətçisi Atif Qəmbərov, ölkəmizin UNESCO-dakı nümayəndəliyinin əməkdaşlarından Anar Kərimov və Eldar Məmmədov, qurumun  baş direktorunun beynəlxalq əlaqələr və ictimai məlumat üzrə köməkçisi Eric Falt, baş direktorun sosial və humanitar elmlər üzrə köməkçisi Pilar Alvarez iştirak etmişlər.

Eric Falt Azərbaycanın mötəbər tədbirə ev sahibliyi etməsindən  çox məmnun olduğunu bildirmiş, Gənclər və İdman Nazirliyinin bu sahədə göstərdiyi köməyi yüksək qiymətləndirmişdir.

Nazir müavini İsmayıl İsmayılov UNESCO ilə Azərbaycan arasında əlaqələrin inkişaf etdiyini xatırlatmış, ölkəmizdə mühüm layihələrin həyata keçirilməsində təşkilatın rolundan bəhs etmiş, hökumətlərarası komitənin fövqəladə iclasının uğurlu keçməsi üçün nazirlik tərəfindən bütün lazımi kömək göstəriləcəyini  vurğulamışdır.

Görüşdə Azərbaycan Respublikasının Gənclər və İdman Nazirliyi ilə UNESCO arasında razılaşma sənədi imzalanmışdır.

Əsgər ƏLİYEV
AzərTAc-ın xüsusi müxbiri
Paris