Azərbaycan Respublikasının ilk telekommunikasiya peykinin orbitə buraxılması ilə əlaqədar ABŞ Konqresinin Nümayəndələr Palatasında Azərbaycan üzrə işçi qrupun üzvü Rodni Aleksandr 2013-cü il fevralın 13-də  Konqresdə bəyanatla çıxış etmişdir.

Azərbaycanın ABŞ-dakı səfirliyindən APA-ya  verilən xəbərə görə, ABŞ-ın Luiziana ştatını təmsil edən konqresmen R.Aleksandr bəyanatında ölkəmizin ABŞ-ın yaxın dostu və müttəfiqi olduğunu qeyd edərək, ilk peykin uğurla orbitə buraxılması münasibətilə Azərbaycanı təbrik etmişdir. Azərbaycan peykinin “Orbital Science Corporation” şirkəti tərəfindən ABŞ-da istehsal olunduğunu xatırladan konqresmen bu tarixi hadisəni iki ölkə arasında genişlənən əlaqələrin növbəti bir nümayişi kimi qiymətləndirmiş və bu peykin Azərbaycan, Mərkəzi Asiya, Yaxın Şərq, Avropa və Afrika ölkələrinə mühüm telekommunikasiya xidmətləri göstərəcəyini bildirmişdir.

 Rodni Aleksandr “Azerspace-1” peykinin orbitə çıxarılmasını Azərbaycan hökuməti və ABŞ-ın özəl sektoru arasında əməkdaşlığın kulminasiyası kimi dəyərləndirmişdir. R.Aleksandr Azərbaycanın bu peyk ilə yanaşı bir müddət əvvəl “Boeing” şirkətindən təyyarələr almaqla, ABŞ-ın aeronavtika sektoruna etimad göstərdiyini və bununla da iqtisadi inkişafın təşviqinə yardım göstərdiyini bəyan etmişdir.

 Sonda konqresmen həmkarlarını bu tarixi hadisə münasibətilə Azərbaycanı təbrik etmək üçün ona qoşulmağa dəvət etmişdir.