Fevralın 14-də Bakıda keçirilən Azərbaycan-Küveyt birgə əməkdaşlıq komissiyasının ikinci iclasında ölkələrimiz arasında müxtəlif sahələrdə əməkdaşlığa dair bir sıra sənədlər imzalanmışdır.

İclasda “Azərbaycan Respublikası hökuməti və Küveyt Dövləti hökuməti arasında təhlükəsizlik və cinayətkarlığa qarşı mübarizə sahəsində əməkdaşlıq haqqında Saziş”, “Azərbaycan Respublikası hökuməti və Küveyt Dövləti hökuməti arasında mədəniyyət sahəsində əməkdaşlığa dair Saziş”, “Azərbaycan Respublikası hökuməti və Küveyt Dövləti Hökuməti arasında gömrük işi sahəsində əməkdaşlıq və qarşılıqlı yardım haqqında Saziş”, “Azərbaycan Respublikası Xarici İşlər Nazirliyinin Diplomatik Akademiyası ilə Küveyt Dövlətinin Xarici İşlər Nazirliyinin Saud-Al-Nasser al-Sabah adına Diplomatik İnstitutu arasında əməkdaşlığa dair və Anlaşma Memorandumu” imzalanmışdır. Bundan əlavə, “Azərbaycan-Küveyt birgə əməkdaşlıq komissiyasının ikinci iclasının Protokolu” imzalanmışdır.

Sənədləri Azərbaycan Respublikasının xarici işlər naziri Elmar Məmmədyarov və Küveyt Dövləti Baş nazirinin müavini, xarici işlər naziri Şeyx Sabah əl-Xalid əl-Hamad əl-Sabah imzaladılar.

AzərTAc