Fevralın 14-də Azərbaycan Respublikasının Baş naziri Artur Rasizadə ölkəmizdə rəsmi səfərdə olan Küveyt Dövləti Baş nazirinin müavini, xarici işlər naziri Şeyx Sabah əl-Xalid əl-Hamad əl-Sabahın başçılıq etdiyi nümayəndə heyəti ilə görüşmüşdür.

Bu səfərin və keçirilmiş görüşlərin ölkələrimiz arasında əlaqələrin inkişafına töhfə verəcəyinə əminliyini bildirən Baş nazir Artur Rasizadə siyasi əlaqələrin yüksək səviyyədə olduğunu, iqtisadi əməkdaşlığın isə hazırkı potensiala cavab vermədiyini qeyd etmişdir.

Baş nazir vurğulamışdır ki, iqtisadi imkanlardan səmərəli istifadə etmək zəruridir. Görüş üçün Azərbaycanın Baş nazirinə minnətdarlığını bildirən Şeyx Sabah əl-Xalid əl-Hamad əl-Sabah Azərbaycana səfərinin iki ölkə arasında əlaqələrin, xüsusilə də iqtisadi sahədə əməkdaşlığın genişlənəcəyinə ümidvar olduğunu bildirmişdir. Görüşdə qarşılıqlı maraq doğuran məsələlər ətrafında fikir mübadiləsi aparılmışdır.