“Avropa İttifaqının genişlənmə məsələləri üzrə komissarı Stefan Fülenin adından müxalifət mətbuatında dərc olunan məlumatlar heç də onların iddia etdiyi kimi deyil. Stefan Füle məxsusi olaraq Azərbaycandakı hadisələrlə əlaqədar bəyanat verməyib. Müxalifət mətbuatı ayrı-ayrı Avropa strukturlarında çalışan şəxslərin sosial şəbəkələrdə yazdıqları fikirləri siyasi şouya çevirməyə çalışır”.

 Bu fikirləri yap.org.az saytına YAP İcra katibinin müavini, Milli Məclisin deputatı Mübariz Qurbanlı demişdir. Onun sözlərinə görə, bu mənada S.Fülenin sosial şəbəkələrdə yayılmış bir cümləsini müxalifət qəzetləri götürürək manşetlərinə çıxarmışlar. Bununla da, guya, Avropa İttifaqının Azərbaycanla bağlı məsələlərlə əlaqədar mənfi fikirli olması iddiası ortaya qoyulur. Müxalifət düşərgəsinin nümayəndələri indiyədək bir sıra hadisələrin Aİ-də müzakirə obyekti olacağı iddiasını da irəli sürüblər. “Amma bütün bunlar onların uydurmasıdır. Bu gün Azərbaycanın Avropa İttifaqı, Avropa Şurası ilə çox normal münasibətləri var.

Prezident İlham Əliyevin ölkəmizdə həyata keçirdiyi siyasət beynəlxalq strukturlarda, o cümlədən Avropa İttifaqında dəstəklənməkdədir. Ona görə də ayrı-ayrı şəxslərin fikirləri, münasibətlərimizə xələl gətirə bilməz və Azərbaycanın həyata keçirdiyi siyasətə təsir etmək imkanına malik deyil”- deyə, YAP İcra katibinin müavini vurğulamışdır.