“Dağlıq Qarabağın müstəqilliyinin tələm-tələsik tanınması avantürizmdir”.

APA -nın “Novosti Armeniya” saytına istinadən verdiyi məlumata görə, bu fikirləri Erebunidə seçicilərlə görüş zamanı Ermənistan prezidenti Serj Sarkisyan demişdir.

 Onun sözlərinə görə, prezidentliyə namizədlərdən bəziləri, xüsusən də ölkənin sabiq xarici işlər naziri, İrs Partiyasının sədri Raffi Ovanisyan Dağlıq Qarabağın müstəqilliyinin tanınmasının vacibliyini qeyd etmişdir: “Raffi Ovanisyan bildirir ki, prezident postuna seçilsə, Qarabağın müstəqilliyini tanıyacaq. Siz bunun nə demək olduğunu anlayırsınız? Bu, çox böyük avantürizmdir, burada söhbət ciddi qərarlardan gedir. Üstəlik, bu sözləri özünü xarici siyasət sahəsində mütəxəssis sayan insan deyir”.

 Göründüyü kimi, Ermənistan prezidenti özü də bilmədən Dağlıq Qarabağın Azərbaycan torpağı olduğunu, bu ərazinin qanunsuz işğal olunduğunu etiraf etmişdir. Siyasi ekspertlər belə hesab edirlər ki, Raffi Ovanisyanın populist çıxışlarla seçiciləri öz tərəfinə çəkmək istəyi Serj Sarkisyanı hövsələdən çıxardığından o, problemin mürəkkəbliyini diqqətə çatdırmaq istəyərkən əsl həqiqəti etiraf etməli olmuşdur.