Böyük Britaniya parlamentinin deputatı Stefen Hepbörn Azərbaycanın işğal olunmuş Dağlıq Qarabağ ərazisindəki Xocalı aeroportunu Ermənistanın yenidən açmaqla bağlı planlarına dair Avropa Azərbaycan Cəmiyyətinin sualına münasibət bildirərkən demişdir: “Birləşmiş Krallıq hökuməti Cənubi Qafqazda firavanlıq, sabitlik və təhlükəsizliyin təmin edilməsi üçün Azərbaycan ilə yaxından əməkdaşlıq edir. Dağlıq Qarabağda münaqişəsi həmin məqsədlərin həyata keçirilməsi üçün böyük təhlükədir”.

Stefen Hepbörn bildirmişdir ki, problemin sülh yolu ilə həlli yalnız Azərbaycan və Ermənistan üçün deyil, o cümlədən bütün region üçün faydalı olacaqdır. Sülh prosesi çərçivəsində beynəlxalq ictimaiyyətlə əməkdaşlıq Birləşmiş Krallıq üçün xüsusilə vacibdir.

Sülhə doğru gedən yolda geriyə addımlardan qaçmaq lazımdır. Azərbaycanın suverenliyini və hava məkanını pozmaqla Xocalı aeroportunun yenidən açılması, şübhəsiz, Ermənistan-Azərbaycan, Dağlıq Qarabağ münaqişəsinin həlli istiqamətində sülh danışıqlarına ciddi zərbə vuracaqdır.

AzərTAc