Yeni Azərbaycan Partiyası (YAP) Gənclər Birliyi tərəfindən yaradılmış “Xarici siyasət klubu”nun (Foreign Policy Club) təqdimat mərasimi keçirilmişdir.

AzərTAc xəbər verir ki, tədbirdə iştirak edən Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov çıxış edərək əsası ulu öndər Heydər Əliyev tərəfindən qoyulmuş siyasi-iqtisadi inkişaf strategiyasının Prezident İlham Əliyevin rəhbərliyi altında uğurla və layiqincə davam etdirildiyini, həyata keçirilən irimiqyaslı layihələr nəticəsində ölkə iqtisadiyyatının sürətlə inkişaf etdiyini, Azərbaycanın beynəlxalq aləmdə nüfuzunun günbəgün artdığını diqqətə çatdırmışdır.

Ə.Əhmədov qeyd etmişdir ki, bu gün Azərbaycan artıq beynəlxalq arenada mövqeyini formalaşdırmaqdadır. Odur ki, fəal gəncliyimiz  Azərbaycanın xarici siyasətini, eyni zamanda dünyada baş verən siyasi, iqtisadi prosesləri dərindən izləməyi bacarmalıdırlar.

Əli Əhmədov vurğulamışdır ki, YAP-ın fəal, geniş dünya görüşünə malik, ictimai siyasi prosesləri təhlil etməyi bacaran və sağlam düşüncə tərzinə sahib  olan gənclərinin bu cür layihələr təşkil etməsi əhəmiyyətli və gəncliyimiz üçün çox  faydalıdır. 

Daha sonra çıxış edən YAP Gənclər Birliyi sədrinin müavini  Ramin Məmmədov “Xarici siyasət klubu” haqqında geniş məlumat vermişdir.

Bildirilmişdir ki, klubun yaradılması partiyanın xarici əməkdaşlığının gücləndirilməsinə xidmət edəcəkdir. YAP-ın geniş xarici əlaqələrə malik olduğunu deyən R.Məmmədov vurğulamışdır ki, klubun yaradılmasında məqsəd bu əlaqələrin daha da  genişləndirilməsində və inkişaf etdirilməsində gənclərin aktivliyini artırmaqdır.

R.Məmmədov klubda xarici əməkdaşlarla birbaşa təmasların qurulacağını, həmçinin mütəxəssislərin daxili və xarici siyasətlə bağlı mühazirələrinin dinləniləcəyini diqqətə çatdırmışdır.