İslam Əməkdaşlıq Təşkilatının (İƏT) baş katibi Ekmaləddin İhsanoğlu AzərTAc-a eksklüziv müsahibəsində demişdir: “Biz Ermənistan-Azərbaycan, Dağlıq Qarabağ münaqişəsi barədə Azərbaycanın ədalətli mövqeyini həmişə dəstəkləmişik və dəstəkləyəcəyik, bu münaqişənin mövcudluğu bizi narahat edir. Mən bunu təşkilatımızın 12-ci sammitində öz məruzəmdə də vurğulamışam”.

Onun sözlərinə görə, Azərbaycan genişmiqyaslı təcavüzlə üzləşmiş və böyük haqsızlığa – öz əzəli ərazilərinin işğalına məruz qalmışdır.

İƏT-in baş katibi demişdir: “Biz bu haqsızlığa və işğala qarşı var gücümüzlə mübarizə aparmağa çalışırıq. Azərbaycan bizim üçün çox əhəmiyyətli və yaxın ölkədir. Mənim bu təşkilatın rəhbəri vəzifəsində fəaliyyətim dövründə İƏT Azərbaycanla bu istiqamətdə böyük addımlar atmış və müəyyən irəliləyişə nail olmuşdur. Ayrıca qeyd etmək istəyirəm ki, biz Prezident İlham Əliyevin şəxsi dəstəyi ilə sizin ölkənizin hökuməti ilə bərabər çox iş görmüşük, sizi inandırıram ki, bu istiqamətdə fəaliyyətimizi davam etdirəcəyik”.

Qeyd etmək lazımdır ki, Ekmaləddin İhsanoğlu İslam Əməkdaşlıq Təşkilatının üzvü olan ölkələrin dövlət və hökumət başçılarının Qahirədə keçirilən 12-ci sammitində öz məruzəsində Qarabağ münaqişəsində Azərbaycanın mövqeyini dəstəkləmişdir.

Asya HACIZADƏ,
AzərTAc-ın xüsusi müxbiri
Qahirə