Xarici İşlər Nazirliyinin mətbuat xidmətindən bildirmişlər ki, ölkəmizdə səfərdə olan Amerika Yəhudi Komitəsinin icraçı direktoru Devid Allan Harrisin başçılıq etdiyi nümayəndə heyəti iyulun 5-də Azərbaycanın xarici işlər nazirinin müavini Vaqif Sadıqovla görüşmüşdür.
Ölkəmizə səfərindən məmnunluğunu ifadə edən D.Harris Azərbaycanda sürətli inkişafın şahidi olduğunu və bu səfərin Azərbaycan-ABŞ münasibətlərinin daha da inkişafına öz töhfəsini verəcəyinə əminliyini bildirmişdir.
Nazir müavini V.Sadıqov Azərbaycan-ABŞ münasibətlərinin cari vəziyyəti haqqında danışmış, ABŞ-ın dövlət katibi xanım Hillari Klintonun iyulun 4-də ölkəmizə rəsmi səfərinin iki dövlət arasında münasibətlərin genişləndirilməsinə təkan verəcəyinə əminliyini vurğulamışdır.
Ermənistan-Azərbaycan, Dağlıq Qarabağ münaqişəsi haqqında qonaqlara məlumat verən V.Sadıqov regionda davamlı sülhün və sabitliyin bərqərar olması üçün münaqişənin Azərbaycanın ərazi bütövlüyü çərçivəsində həllinin zəruriliyini bildirmişdir.
Azərbaycanın çoxmillətli bir ölkə olduğunu qeyd edən nazir müavini əsrlər boyu azərbaycanlıların və bir çox millətlərin burada sülh və əmin-amanlıq şəraitində yaşadığını vurğulamışdır.
Görüşdə qarşılıqlı maraq doğuran bir sıra məsələlər ətrafında fikir mübadiləsi aparılmışdır.