Avropa Parlamentinin üzvü Kristiina Ojulan Dağlıq Qarabağda Xocalı aeroportunun yenidən açılmasına dair atılan hər bir addımı ciddi şəkildə qınayır. Trend-in məlumatına görə, bunu parlamentari Ermənistanın Xocalı aeroportu barədə planlarına dair sualı cavablandırarkən demişdir. Bu barədə Trend-ə Avropa Azərbaycan Cəmiyyətindən məlumat verilmişdir.

Kristiina Ojulan demişdir: “Azərbaycan ərazisi olan və Ermənistan silahlı qüvvələri tərəfindən işğal edilmiş Dağlıq Qarabağda Xocalı aeroportunun yenidən açılmasına dair atılan hər bir addımı ciddi şəkildə qınayıram”.

O qeyd etmişdir ki, bu hərəkət Dağlıq Qarabağ münaqişəsinin sülh yolu ilə həllinə ciddi ziyan vurmaqla bərabər, beynəlxalq hüququ, yəni BMT Təhlükəsizlik Şurasının dörd qətnaməsini və Çikaqo Konvensiyasını pozacaqdır:“Xocalı aeroportunun yenidən açılışının ATƏT-in Minsk Qrupunun vasitəçiliyi ilə keçirilən sülh danışıqlarına olduqca mənfi təsiri olacaqdır. Bundan əlavə, Ermənistan rəhbərliyinin məsuliyyətsiz təşəbbüsü Avropa Birliyinin sülh prosesi istiqamətində fəaliyyətinə hörmətsizlik kimi qəbul edilə bilər”.

 Kristiina Ojulan vurğulamışdır ki, 1992-ci ildə baş vermiş Xocalı faciəsini nəzərə alsaq bu plan bütün regionda gərginliyin artmasına gətirib çıxaracaqdır.