Əfqanıstandan sülhməramlı qüvvələrin çıxarılması məsələsi Azərbaycanla NATO arasında müzakirələrin əsas predmetlərindən biridir.

NATO-nun  Cənubi Qafqaz regionunda əlaqələndirici zabiti Uilyam Laxua APA-ya bildirmişdir ki, Azərbaycanla NATO arasında əməkdaşlıq uğurla davam edir:“Azərbaycanla NATO arasında yaxşı və məhsuldar münasibətlər formalaşıb. Bu münasibətlər çərçivəsində Əfqanıstandakı sülhməramlı kontingentin çıxarılması, uçuşlar məsələsi ilə bağlı danışıqlar davam edir və Azərbaycan bu sahədə son dərəcə mühüm əhəmiyyət kəsb edir. Əfqanıstanda sülhməramlı kontingentin, o cümlədən Azərbaycan sülhməramlılarının çıxarılması müzakirə mərhələsindədir, 2014-cü ildən sonrakı fəaliyyət planı, prosesin necə həyata keçirilməsi müzakirə olunur. Azərbaycan, əlbəttə ki, bu prosesin bir hissəsidir, çünki Azərbaycan öz coğrafi mövqeyinə görə kontingentin çıxarılması üçün potensial baxımdan ən uyğun ölkədir. Buna görə də Azərbaycan sülhməramlı qüvvələrin Əfqanıstandan Avropaya geri qayıtması məsələsində mühüm həlqə rolunu oynaya bilər”.