Davos İqtisadi Forumunun Azərbaycanda keçirilməsi haqqında qərar ölkəmizin beynəlxalq müstəvidə artan nüfuzunun təzahürüdür.

Bu sözləri yanvarın 30-da Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov YAP Nizami rayon təşkilatının nəzdində fəaliyyət göstərən Heydər Əliyev Məktəbinin yeni kursunun açılış mərasimindən sonra jurnalistlərə müsahibəsində demişdir.

Ə.Əhmədov bildirmişdir ki, bu gün biz beynəlxalq aləmdə ölkəmizin nüfuzunun artmasını müşahidə etməkdəyik. Azərbaycanda çox əhəmiyyətli müxtəlif beynəlxalq tədbirlər keçirilir.

YAP sədrinin müavini vurğulamışdır ki, dünyanın ən mötəbər iqtisadi forumlarından biri olan Davos İqtisadi Forumunun aprel ayında Azərbaycanda keçirilməsi haqqında qərarın qəbul olunması olduqca əhəmiyyətlidir. Bu, bir tərəfdən Azərbaycanın beynəlxalq müstəvidə artan nüfuzunun təzahürü, digər tərəfdən isə Prezident İlham Əliyevin rəhbərliyi ilə Azərbaycanda həyata keçirilən iqtisadi islahatlara dünya birliyinin verdiyi yüksək qiymətin ifadəsidir.

Bakıda keçiriləcək Davos İqtisadi Forumu bütövlükdə bu tədbirin inkişafına yeni məna və çalarlar verəcəkdir.

AzərTAc