Azərbaycanın Braziliyadakı səfiri Elnur Sultanov etimadnaməsini bu ölkənin Prezidenti Dilma Russefə təqdim etmişdir.

Xarici İşlər Nazirliyinin mətbuat xidmətindən AzərTAc-a bildirmişlər ki, Elnur Sultanov Azərbaycan Prezidenti İlham Əliyevin salamlarını Braziliya Prezidenti Dilma Russefə çatdırmışdır.

Bu il Azərbaycan-Braziliya diplomatik əlaqələrinin yaranmasının 20 illiyinin qeyd edildiyinin bildirildiyi görüşdə ölkəmizin Braziliya ilə hərtərəfli əməkdaşlığın genişləndirilməsində maraqlı olduğu diqqətə çatdırılmışdır.

 Braziliya Prezidenti Dilma Russef öz növbəsində salamlarını Azərbaycan Prezidenti İlham Əliyevə çatdırılmasını xahiş etmişdir.

Prezident Dilma Russef Azərbaycanın Braziliyada səfirliyinin açılması münasibətilə Elnur Sultanovu təbrik etmiş, ölkələrimiz arasında əməkdaşlığın uğurla inkişaf etdiriləcəyinə ümidvar olduğunu bildirmişdir.

Elnur Sultanov Azərbaycan-Braziliya əlaqələrinin bir çox istiqamətlər, xüsusilə də ticari-iqtisadi və humanitar sahələr üzrə əməkdaşlığın böyük potensiala malik olduğunu vurğulamış, ikitərəfli münasibətlərin möhkəmlənməsi naminə səfirlik tərəfindən fəal işin aparılacağını bildirmişdir.

Braziliyanın xarici işlər naziri Antonio Patriota və Braziliya Prezidentinin xarici siyasət üzrə müşaviri Marko Aurelio Qarsia da təqdimat mərasimində iştirak etmişlər.