Yanvarın 21-də Avropa Şurası Parlament Assambleyasının (AŞPA) qış sessiyası qurumun bürosunun və siyasi qrupların yığıncaqları ilə öz işinə başlamışdır.

Büroda qış sessiyasında müzakirə olunacaq gündəlik məsələlər sonuncu dəfə nəzərdən keçirilərək qəbul edilmiş və deputatların müzakirəsinə verilməsi tövsiyə olunmuşdur.

Sessiyada AŞPA sədrinin seçkisi keçirilmişdir. Deputatlar yekdilliklə fransalı deputat Jan-Klod Minyonu yenidən qurumun sədri seçmişlər.

Jan-Klod Minyon ona yenidən etibar göstərdiklərinə görə həmkarlarına təşəkkür etmiş, keçənilki  fəaliyyəti dövründə gördüyü işlərdən, bir çox ölkələrə səfərlərindən danışmış, rəhbərlik edəcəyi AŞPA-nın fəaliyyətində mühüm dəyişikliklər olunacağına səy göstərəcəyini, sərbəst fikir mübadiləsinə üstünlük verəcəyini, milli parlamentlərlə əlaqələri daha da möhkəmləndirəcəyini, Avropa Şurasının demokratiya, insan haqları və qanunun aliliyi prinsiplərinin fəaliyyətinin prioritetləri olacağını, Avropa İttifaqı ilə əlaqələrin inkişafına xüsusi diqqət yetirəcəyini bəyan etmişdir.

Sessiyada AŞPA sədrinin 19 deputatdan ibarət müavini seçilmişdir. Azərbaycanın AŞPA-dakı nümayəndə heyətinin rəhbəri Səməd Seyidov da yekdilliklə qurum sədrinin müavini seçilmişdir.

Sessiyada gündəlik təsdiq olunduqdan sonra ənənəvi sərbəst dinləmələr keçirilmişdir.

Əsgər ƏLİYEV
AzərTAc-ın xüsusi müxbiri
Strasburq