Azərbaycan Respublikasının Diasporla İş üzrə Dövlət Komitəsindən aldığımız məlumatda bildirilir ki, yanvarın 11 -də Vaşinqtonda Amerika-Azərbaycan Şəbəkəsinin (USAN) həmtəsisçisi və rəhbəri Bədir Məmmədli, Azərbaycan Araşdırmaları üzrə Vaşinqton Mərkəzinin rəhbəri Qədir Şirəliyev və ABŞ-Azərbaycan Ticarət Palatasının əvəzedici rəhbəri Süzan Sadıqova ABŞ-ın Azərbaycandakı səfiri Riçard Morninqstar ilə görüşmüşlər.

Azərbaycan-Ermənistan, Dağlıq Qarabağ münaqişəsinin nizamlanmasına dair aparılan danışıqların vəziyyəti, Amerika və Azərbaycan arasında sosial-mədəni əlaqələrin, ikitərəfli əməkdaşlığın inkişafı məsələləri ətraflı müzakirə olunmuşdur.

Görüş zamanı Azərbaycan diaspor təşkilatlarının rəhbərləri Dağlıq Qarabağ münaqişəsinin həllində ABŞ-ın, xüsusilə Barak Obamanın yeni administrasiyasının və bu ay yeni təyin olunmuş dövlət katibi Con Kerrinin daha fəal iş aparacağına ümidvar olduqlarını ifadə etmişlər.

Təşkilatların rəhbərləri işğal olunmuş Dağlıq Qarabağa ABŞ-ın birbaşa yardım göstərməsindən, həmçinin, bu məsələ barədə senator Robert Menendez və Barbara Boxerin qərəzli mövqeyindən narahatlıqlarını ifadə etmiş, “907-ci düzəliş”in tezliklə ləğv olunacağına ümid etdiklərini bildirmişlər.

İkitərəfli əlaqələrin inkişafında Azərbaycan- Amerika Cəmiyyətinin rolunu artırmaq üçün bütün imkanlardan istifadə olunması məqsədəuyğun hesab edilmişdir. Amerika Azərbaycan Şəbəkəsinin(USAN) nümayəndəsi Bədir Məmmədli ABŞ-dakı Azərbaycan diasporunun maarifləndirilməsi istiqamətində geniş təbliğat və siyasi fəaliyyətlə məşğul olan USAN- nın rolu barədə səfir Morninqstara məlumat vermişdir. Səfir Morninqstar ABŞ-Azərbaycan əlaqələrinin genişləndirilməsinə önəmli töhfə verdiklərinə görə təşkilata təşəkkürünü bildirmiş və yaxın gələcəkdə Azərbaycan- Amerika Cəmiyyətinin nümayəndələri ilə görüşə ümidvar olduğunu qeyd etmişdir.

“Xalq qəzeti”